Üses Team
D Ponyspielgruppä leite ich, d Bianca Enz.. Ich bi Mueter vo vier Chind, em Nadim 2001, dr Lea 2010, dr Nahla 2011 und em Levin 2021 und wohnä uf em Hof Oberimatt in Giswil. Scho früehner han ich immer wider uisghulfä bi de Ponyspielgruppä und jetzt leit ich sie voller Elan.
Alli üsi Ross ufem Hof sind us Island. Will sie oi Erwachsäni träga chönd, seid mä ihnä Island-Pferd. Pony isch also nit korrekt, aber miär ufem Hof sägid üsnä Liäbling so. Dr Isländer zeichnet sich uis dur an goldigä, guatmüätigä Charakter und sehr viel Geduld. Islandpferd werdid sit über 800 Jahr rein züchtet uf Island, und ä Isländer, wo einisch Island verlah het, darf nimä zrugg.
Hie stelled sich üsi Isländer kurz selber vor:
Ich bi d Blika und am 1. Mai 2003 ufem Hof Oberimatt uf d Wält cho. Mini Farb heisst Bruinfalb.
Mängisch bin ich chli en Diva, aber das vergid mä miär schnäll, da ich so en Hübschi bi.
Blika isch Isländisch und heisst übersetzt: Liechtsträife am Horizont.
Ich bi d Hremmsa und 1996 uf Island uf d Wält cho und sit 2010 ufem Hof Oberimatt dehei. Mini Farb isch Dunkelbruin.
Ich bi ganz en Gmüetlichi, wenn's sii muess, bini aber eini vo de Schnällschta im Stall..
Hremmsa isch Isländisch und heisst übersetzt: Pfiil.
Ich bi de Gikkur und 1995 in Island uf d Wält cho. Sit 2015 bin ich ufem Hof Oberimatt dehei. Alli Chind liebid mich, da ich en Schimmel bi.
Mich chamä sehr guet longierä, aber underwägs bin ich chli verfrässä.
Gikkur isch Isländisch und heisst übersetzt: Hahn im Korb, was au stimmt, bini doch nebem Huginn dr einzig Wallach in der Pony-Truppä.
Dä Gikkur isch leider über d Rägebogäbrugg galoppiert. 😢
Ich bi de Huginn und 1991 in Island uf d Wält cho. Sit em Johr 2000 bin ich uf em Hof Oberimatt dehei. Ich bi en Brunä und de Ältischt i dä Rundi.
Ich bi ganz en Zueverlässigä, denn mich bringt nüd so schnäll zur Rueh uis.
Au Huginn isch Isländisch und isch en Vorname, wohl eng verwandt mit Hugo bi üs.
Dä Huginn isch leider über d Rägebogäbrugg galoppiert 😢
ich bi d Nepja und 2009 uf Island uf d Wält cho. Sit 2012 bin ich ufem Hof Oberimatt dehei. Ich bi en Schimmel.
Ich bi no rächt jung und darf leider bi dr Spielgruppä no nid mitmachä, da ich no viel muess lehrä.
Nepjia heisst übersetzt: Näbel.
Ich bi de Bakkus und am 9. Juni 2013 uf em Hof Oberimatt uf d Wält cho. Mis Mami isch d Blika, und ich bi en Fuchsfalb.
Ich bi de Jüngschti im Stall und uf miär chamä no nid Riitä.
Bakkus isch dr Gott vom Wii.
Hind
D Hind isch sit 2022 bi üs uf em Hof dehei. Hind isch isländisch für Reh. D Hind hed en Therapie Uisbildig absolviert und isch somit super geeignet für'd Spielgruppä.
Sie hed 2023 es wunderschöns Fohlä bi üs im Stall becho, dä Hrami.
Ich heissä Hrami und bi im Mai 2023 uf em Hof uf d Wält cho. Miis Mami isch d Hind und mii Papi heisst Fleygur.
Ich bi jetzt uf de Fohläweid und cha dä ganz Tag mit anderä Fohlä spielä.